UNIÓN LIBRE - CADERNOS DE VIDA E CULTURAS - EDICIÓS DO CASTRO

CLAUDIO RODRÍGUEZ FER

Presentación

Escritor lucense. Como poeta publicou os poemarios eróticos Poemas de amor sen morte, Tigres de ternura, Historia da lúa, A boca violeta e Cebra, reunidos en Vulva e antologados en A muller núa, así como Cinepoemas, Lugo blues, Extrema Europa, A unha muller descoñecida, Moito máis que mil anos (antoloxía céltica efectuada por María Lopo), Rastros de vida e poesía, A loita continúa, Viaxes a ti, Ámote vermella e Unha tempada no paraíso. É autor de diversas obras narrativas -como Meta-relatos ou Os paraísos eróticos- e críticas -como A Galicia misteriosa de Ánxel Fole, Poesía galega, Antonio Machado e Galicia, Arte literaria, A literatura galega durante a guerra civil, Acometida atlántica, Ánxel Fole. Vida e obra, Guía de investigación literaria e máis dunha vintena de edicións en torno a moi diversos autores. Reuniu a súa poesía en Amores e clamores e a súa narrativa en Contos e descontos.

Foi catedrático de ensinanza media en Galicia e profesor das Universidades da Cidade de Nova York, da Alta Bretaña, da Bretaña Sur e de Santiago de Compostela, onde se ocupa de Moenia. Revista Lucense de Lingüística e Literatura, e da Cátedra de Poesía e Estética José Ángel Valente, poeta este sobre quen publicou varios libros e edicións. Coordina, con Carmen Blanco, Unión Libre. Cadernos de vida e culturas.

Entre outras distincións, recibiu, no terreo poético, o Premio da Crítica Española; no investigador, dúas veces o Premio Losada Diéguez; no académico, o Premio Extraordinario de Doutoramento; no cívico, o Premio Galiza Mártir pola Recuperación da Memoria Histórica, e, no internacional, o Doutoramento Honoris Causa pola Universidade da Alta Bretaña. Foi traducido a numerosos idiomas e realizou obras cos artistas Granell, Ochoa e Sara Lamas, así como a carpeta A vida. Gravados sobre corpo. Sobre a súa obra publicáronse os libros Por un vocabulario galego do sexo. A terminoloxía erótica de Claudio Rodríguez Fer e O lume vital de Claudio Rodríguez Fer, de Olga Novo, e Os mundos de Claudio Rodríguez Fer de Natalia Regueiro.

Ver bibliografía de Claudio Rodríguez Fer