Index | Presentación | Hemeroteca | Coordinación | Comité | Ilustración | Contacto
EROTISMOS NÚMERO 4
EROTISMO ESPECIAL Tratado
da pel (De corpos e mentes na éxtase),
por Olga Novo As
orixes dos mundos (Poesía visual),
por Claudio Rodríguez Fer Dos
hortos de Afrodita en Lesbos. Paráfrases de Safo,
por Emma Luaces Escolma
de textos eróticos latinos (Catulo, Ovidio, Petronio e Apuleio),
por Aurora López e Andrés Pociña Suntuosas.
As "cortesana honestae" na Italia do Renacemento,
por Erika Bornay A
linguaxe do amor e do desexo na obra de Luís Seoane,
por Xosé Luís Axeitos Ánfora,
por Luz Pozo Garza (Edición conmemorativa do seu cincuentenario, a cargo
de Natalia Regueiro) Furor
Ferré. Catro cancións de amor, de Léo Ferré,
por María Lopo A
boca da sombra que te ergue branca,
por Sergio Lima A
pluma e o pincel,
por Sara Lamas Eróticas
heréticas heteroxéneas,
por Carmen Blanco
|
ERÓTICAS
HERÉTICAS HETEROXÉNEAS: POR UNHA FILANTROPÍA FILÓXINA por
Carmen Blanco
Alcuns dixeren que no havia profit en lo foder en null temps. Los que açò dixeren digueren
gran mentida Speculum al foder The time of
my intents are savage-wilde, More fierce and more
inexorable far Than empty tigers or the
roaring sea William
Shakespeare, Romeo and Juliet Je
suis venu dans la nuit Pour
barbouiller tout cela Je
suis venu pour ton nom Pour l'ecrire Avec
du sperme Boris
Vian, Liberté Dans
le rapprochement secret de deux corps humains, toute la Société est
toujours en tiers. Jean
Rostand,
Bestiaire d'amour Una de las indigencias de nuestros
días
es la que al amor se refiere. No
es que no exista, sino que su existencia
no halla
lugar. María
Zambrano, Dos fragmentos sobre el
amor
Porque
seguimos a experimental apertura escéptica do noso Francisco Sánchez
sabemos que nada se sabe certo e que quizais o que se ensina non ten máis
virtude que a que recibe de quen o ensina. E só así desde este radical
relativismo materialista e integral podemos dicir o que hoxe sabemos, máis
alá do autoritarismo do dicir das autoridades e das opinións dadas, en
realidade, auténticos arcaísmos ideolóxicos.
O
saber máis seguro das ciencias da natureza e das ciencias humanas ensínanos
que falar de erotismo hoxe é facelo tamén, polo menos, de amor, sexo,
pornografía e obscenidade, de corpo, mente, xénero, sexualidade e
subxectividade, conceptos que abranguen o continuo dunha complexísima
realidade definida na interferencia das persoas e dos poderes no discorrer
da existencia da carne e do mundo, é dicir, na historia[i].
Sen dúbida os avances do pensamento progresista que nos deu a
posmodernidade evidenciaron esas construccións interesadas dos poderes e
dos contrapoderes no transcorrer dialéctico dos distintos códigos eróticos
nos que se foron encerrando sucesivamente aquelas palabras e cousas, ensinándonos
de paso posibles camiños para saír do encerro e vías alternativas para
libertarnos das distintas ataduras identitarias tanto individuais como
colectivas.
Por
isto, desde a máis absoluta apertura heteroxénea, retomamos os comezos
espidos gardados nas etimoloxías primeiras dos vocábulos que nos ocupan
e imos en procura do que queda de Eros despois de traspasar todas as
formas coñecidas das distintas erotoloxías e todos os sentidos dos
diversos códigos amorosos. Orientes e Occidentes, dogmas e herexías,
normativas e transgresións, imposicións e contestacións, maiorías e
minorías, filias e fobias, correntes cultas e populares, tradicións e
vangardas, integracións e disolucións... mostran as infindas variacións
do fenómeno erótico.
E
desde Galicia[ii], o lugar concreto da historia na que estamos,
vemos pasar ao lonxe os efectos do pederasta amor grego, da erótica cortés,
da libertina, da romántica, da vangardista e da pornográfica, como vemos
quedar os pousos materialistas e expansivos do entusiasmo da paixón pagá
dos ritos orxiásticos, xunto ás pegadas idealistas ascensoriais do
uranismo platónico, da contradictoria carnalidade mesiánica do conxugal
amor bíblico e da tráxica escisión cristiá da boa alma con ás e a
mala besta do corpo. Vemos tamén todo o peso dos poderes que impoñen o
seu imperio por riba dos imperativos das paixóns que tratan de abrirse
paso e vemos ademais o profundo arraigo patriarcal da misoxinia en homes e
mulleres, independentemente da súa opción sexual, por mais que os homes
que aman as mulleres e as mulleres que aman as mulleres avoguen por unha
filantropía filóxina.
A
dominante concepción idealista, escindida e dicotómica do mundo viviu
traxicamente a dialéctica entre Eros e Thanatos, mais o materialismo
integrador aceptou a diversidade creativa e destructiva do proceso vital e
tratou de apegarse ao que cría máis libre e necesario segundo a natureza
e apartarse do que aparecía imposto pola historia innecesaria. Amor e
morte atópanse á par desde os antigos ritos funerarios con cerimonial de
sexo sagrado ata os crimes cotiáns e actuais dos brutais amores que
matan. Porque é forte o amor como a morte, di o Cantar
dos Cantares, e porque o que sabe amar aprende a morrer, como lembra
María Zambrano. Por isto sempre o progresismo profundo tivo o optimismo
de procurar o pracer e a felicidade humanas denunciando a imbecilidade política
e furando as tebras morais que conducían ao pesimismo, para estudiar as
atraccións dos corpos e buscarlles o lugar que non tiñan. A Harmonía
universal de Fourier -de quen tomamos os termos de imbecilidade e
escuridade políticas- é a utopía erótica máis emblemática e, máis
alá da súa concreta codificación, responde ao principio libertario do
desexo do ser humano reconciliado consigo mesmo e liberado das tiranías
que celebrarán as sucesivas revolucións nos seus momentos máis
explosivos e exaltarán as artes máis abertas.
Fronte
á tristeza da morte, a alegría da vida. Contra as opresións do poder as
liberdades do sexo. Así é Eros. Por isto, con amor e con humor,
sexualmente, é dicir, con todo o seu ser, Boris Vian atrévese a afirmar
na súa conferencia "Utilité d'une littérature érotique" o
uso revolucionario da literatura lasciva: Et puisque l'amour, qui est tout de même, je le répète, le centre d'intérêt de la majorité des gens sains, est barré et entravé par l'État, comment s'étonner que la forme actuelle du mouvement révolutionnaire soit la littétature érotique? (...) Oui,
les vrais propagandistes d'un ordre nouveau, les vrais apôtres de la révolution
future (...) sont les auters dits licencieux. Lire des livres érotiques,
les faire connaître, les écrire, c'est préparer le monde de demain et
frayer la voie à la vraie révolution[iii].
Todo isto
está na fermosura das palabras orixinarias. A alegría, a diversión e o
desenfreo da lascivia; a exuberancia, a profusión, a abundancia e o
exceso da luxuria; a compracencia no pracer da voluptuosidade; o gozo
sensual dos sentidos. A relaxación do disoluto; a afección do vicio; os
desexos, os antollos, os caprichos libidinosos... A excitación pornógrafa
e obscena do pracer dos homes e das mulleres. A liberdade da vida
discorrendo líquida e libre, como auga e como os fluídos dos sangues,
dos suores, dos leites, das lágrimas, dos fluxos. Eros é de natureza líquida
no Banquete de Platón. E o deus
Fascinus facía fuxir todo mal: hic habitat felicitas era o seu lema anunciado polo falo nas
paredes de Pompeia, por exemplo, como a doación de vida plena das deusas
prehistóricas era evocada polas vulvas, pozas e buratos das pedras de
todo o mundo.
Sabemos
pola historia que a apertura aos praceres múltiples máis alá de
normativas e códigos foi tamén posible. E foron posibles a variación e
a repetición, os canons e as rupturas. Porque as unións viñan unhas
veces da memoria do pracer que fixaba os goces da parella canónica das
orixes da vida e viñan outras dos desexos da imaxinación que non quere límites
e si quere lúdica e multiplicaba as rupturas e as perversións todas.
Todo era posible na liberdade. Na núa e soa liberdade de cada quen. Non.
Nada que non queiras. Si. Todo o que queiramos. Non. Nunca cando non
queiras. Si. Sempre cando queiramos.
Mais
a nuez é un longo camiño solitario sen resultado seguro e desde logo
nunca xamais se nos dá de inmediat. Na soidade de cada quen co seu sexo
son múltiples os sentidos do nós
nus que di Olga Novo, porque nós
é o mundo social que temos, aínda que nós
sexa tamén o mundo particular que creamos e sexa case inalcanzable o nus
sós, do que sabe meu amigo, porque os poderes non queren deixarnos
nunca sós, na independencia e a
liberdade radicais do nós e o nus
que queiramos.
Os
cárceres do mundo son tamén os cárceres do amor e coñecemos os seus
muros. Contra eles erguéronse fortes defensas. A negación do amor e a
negación do sexo foron dúas das súas vías extremas. Pero Eros sempre
se rebelou contra esas armas porque nada hai máis forte que a paixón erótica,
atracción salvaxe e incombatible que quere mellor a pulsión do sexo e a
pulsión do amor nacidas xuntas do corpo todo, da pel da carne, do que se
di corazón e do cerebro, da persoa toda material porque a alma parece que
non existe. Sócrates no Fedro
de Platón fala contra a falsidade do eros do amigo sen amor e Andy Warhol
contra a conxunción de amor e sexo persoal. A alegoría helenística di
que Anteros, o amor recíproco, medra en compañía de Eros. A exaltación
amorosa pode ser o mellor afrodisíaco, mais sen dúbida tamén o desamor
pode resultar o mellor antídoto erótico e non parece sensato cultivar os
amores non correspondidos. Contra o control represivo que se atreve a
xulgar a natureza das unións opoñamos a liberdade erótica das persoas
para escoller entre todas as múltiples posibilidades de unión. E que non
se poda dicir con fundamento que non sabemos nada do amor. Pois do amor
nada se sabe nunca. Só isto sabemos. Quid?
[i].
Véxase unha explicación máis pormenorizada destes temas no escrito
"Lume xelado" de Mulleres
e independencia (Do Castro, Sada, A Coruña, 1995) e nos apartados
sobre a construcción do suxeito en O
contradiscurso das mulleres (Nigra, Vigo, 1995) e na versión
castelá ampliada El contradiscurso de las mujeres (Nigra, Vigo, 1997). [ii].
Témonos tracexado de maneira aproximada algunhas das liñas eróticas
presentes na nosa literatura nos artigos "Amigas e amantes"
(La Voz de Galicia, 12,
maio, 1998) e "A casamenteira galaica" (La
Voz de Galicia, 27, abril, 1999). [iii].
Boris Vian, Écrits
pornographiques, Chistian Bourgois, Paris, 1980, pp. 35-36.
|
Index | Presentación | Hemeroteca | Coordinación | Comité | Ilustración | Contacto